കെട്ടിട നിര്‍മാണ കേന്ദ്രത്തില്‍ വച്ചുണ്ടായ വീഴ്ചയില്‍ സന്താനോല്‍പാദനശേഷി നഷ്ടപ്പെട്ട എന്‍ജിനീയറിന് 1,40,000 ദിര്‍ഹം നഷ്ടപരിഹാരം നല്‍കാന്‍ അബൂദബി ഫാമിലി, സിവില്‍, അഡ്മിനിസ്ട്രേറ്റിവ് കോടതി വിധിച്ചു.
ഒരു അറബ് പൗരനാണ് തന്റെ തൊഴിലിടത്തില്‍ നിന്നും 20 ലക്ഷം ദിര്‍ഹം നഷ്ടപരിഹാരം വേണമണ ആവശ്യവുമായി കോടതിയെ സമീപിച്ചത്. ഈ അപകടം നടക്കുമ്ബോള്‍ ഇദ്ദേഹം സൈറ്റ് എന്‍ജിനീയറായിരുന്നു. അന്ന് പരാതിക്കാരന് 32 വയസ്സായിരുന്നു പ്രായം. നിര്‍മാണ കേന്ദ്രത്തിലെ ഭിത്തികളെ തമ്മില്‍ ബന്ധിപ്പിച്ചിരുന്ന തടിപ്പാലം ശരിയായി രീതിയില്‍ ഉറപ്പിക്കാത്തതിനാല്‍ അതിലേക്കു കയറിയ ഇയാള്‍ മൂന്നു മീറ്റര്‍ ഉയരത്തില്‍ നിന്നും താഴേക്കു പതിക്കുക ആയിരുന്നു. വീഴ്ച്ചയില്‍ ഈ യുവാവിന്‍റെ നട്ടെല്ലിന് ഗുരുതരമായി പരിക്ക് പറ്റി. പരിക്കേറ്റ ഇയാളെ ഉടന്‍ തന്നെ ആശുപത്രിയിലെത്തിച്ച് വിദഗ്ധ ചികിത്സ നല്‍കിയെങ്കിലും നട്ടെല്ലിനേറ്റ ക്ഷതം പൂര്‍ണമായി മാറിയില്ല.
ഇയാളുടെ നട്ടെല്ലിന് കാര്യമായ പരിക്കു പറ്റിയെന്ന് മാത്രമല്ല നട്ടെല്ലിന് സ്ഥിരമായ വൈകല്യവും ഉണ്ടായി. തനിക്ക് വിവാഹം കഴിക്കാന്‍ കഴിയില്ലന്നും തന്റെ സന്താന ഉല്പ്പാദന ശേഷി നഷ്ടപ്പെട്ടതായും പരാതിക്കാരന് കോടതിയെ അറിയിച്ചു. ഈ വീഴ്ച്ച ഉണ്ടാക്കിയ ആഘാതത്തില്‍ കൂടുതല്‍ സമയം ഇരിക്കാനോ അധിക ദൂരം നടക്കാനോ ജോലി ചെയ്യാനോ തനിക്ക് കഴിയുന്നില്ലെന്നും യുവാവ് അറിയിച്ചു.
ഇയാളുടെ വാദം കേട്ട കോടതി ആദ്യം ഇയാള്‍ക്ക് 60,000 ദിര്‍ഹം നഷ്ടപരിഹാരം നല്‍കാനായിരുന്നു വിധിച്ചത്. പിന്നീട് അപകടം മൂലം ഈ യുവാവിനുണ്ടായ മറ്റുള്ള നഷ്ടങ്ങള്‍ കൂടി പരിഗണിച്ചു 80,000 ദിര്‍ഹം കൂടി ഇയാള്‍ക്ക് നഷ്ട പരിഹാരം നല്‍കാന്‍ വിധിക്കുക ആയിരുന്നു. കൂടാതെ ഈ യുവാവിന്‍റെ ഇതുവരെയുള്ള കോടതി ചെലവുകളും മറ്റും ഈ തൊഴില്‍ സ്ഥാപനം നല്‍കണമെന്ന് കോടതി അറിയിച്ചു.